'துருவம்' இணையத்தளம் தற்போது தனியொருவருக்கு விற்கப்பட்டதாக செய்திகள் பரவிவருகின்றன. எமது ஆசிரியர் பீடத்துக்கும் பலர் தொலைபேசி, மின்னஞ்சல் மற்றும் நேரடியாகவும் இதுதொடர்பாக விசாரித்துள்ளனர். ஆகவே, இதுதொடர்பாக நாம் வாசகர்களுக்கு விளக்கமளிக்கவேண்டிய கடப்பாட்டில் உள்ளோம்.
'துருவம்' இணையத்தளம் யாருக்கும் விற்கப்படவும் இல்லை, விற்கப்படவும் மாட்டாது. நாங்கள் ஆரம்பத்திலிருந்து தனித்துவத்துடன் இயக்கிவருகின்றோம். எந்தக் காரணத்துக்காகவும் தனிப்பட்ட ஒருவருக்கோ அல்லது ஒரு நிறுவனத்துக்கோ இதனை விற்பனை செய்வதற்குரிய தேவை எமக்கு இல்லை.
எமது வளர்ச்சியை தாங்கிக்கொள்ள முடியாத சில சக்திகளே இவ்வாறான செய்திகளைப் பரப்பி வருகின்றனர். இதுமுற்றிலும் உண்மைக்குப் புறம்பானது. ஆகவே, வாசகர்களாகிய நீங்கள் இந்த வதந்தியை நம்பவேண்டாம். இதுபோன்று யாராவது 'துருவம்' இணையத்தளத்துக்கு உரிமம் கோரினால் எமது ஆசிரியர் பீடத்துடன் தொடர்புகொண்டு தெரியப்படுத்துமாறு வாசகர்களை கேட்டுக்கொள்கின்றோம்.
பல சிரமங்களுக்கு மத்தியில் நாம் துருவம் இணையத்தளத்தை நடாத்தி வருகிறோம். ஆரம்பித்து 3 மாதங்களுக்குள் தற்பொழுது இலங்கையில் அதிகமாகப் பார்க்கப்படும் தமிழ் இணையத்தளங்களுக்குள் ஒன்றாக துருவம் இணையத்தளமும் இருக்கின்றது என்பதை மகிழ்ச்சியுடன் அறியத்தருகின்றோம். அத்துடன் (அலெக்ஸா) தரப்படுத்தலிலும் வேகமாக முன்னேறிக்கொண்டு வருகின்றோம்.
ஏனைய தமிழ் இணையத்தளங்களிலில் இருந்து மாறுபட்டு செய்திகளை கொப்பியடிக்காமல், ஒவ்வொரு பிராந்தியத்துக்கும் தனித்தனியாக செய்தியாளர்களை நியமித்து அவர்கள் சேகரிக்கின்ற செய்திகளை நாம் உடனுக்குடன் பிரசுரிக்கின்றோம். பல பிரயத்தனங்களுக்கு மத்தியில் எமது செய்தியாளர்கள் செய்திகளை சேகரித்து இரவு, பகல் பாராது துருவத்துக்காக உழைத்து வருகின்றனர். அவர்களுக்கு எமது ஆசிரியர் பீடம் நன்றிகளைத் தெரிவித்துக்கொள்கிறது.
இலங்கைக்குள் மட்டுப்படுத்தப்படாமல் தற்போது வெளிநாடுகளிலும் நாங்கள் செய்தியாளர்களை நியமித்து வருகின்றோம். எதிர்வரும் காலங்களில் புதிய பல வேலைத்திட்டங்களை அமுல்படுத்துவதற்கும் திட்டமிட்டுள்ளோம். ஆகவே, வாசகர்களாகிய நீங்கள் வதந்திகளை நம்பாமல் துருவத்தின் வளர்ச்சிக்கு பக்கபலமாக இருக்குமாறு அன்புடன் கேட்டுக்கொள்கிறேன். உங்களின் ஆதரவிலேயே எமது வளர்ச்சி தங்கியுள்ளது. நன்றி.
- பிரதம ஆசிரியர்
0 comments:
Post a Comment